Bielarus.net Навіны // Аналітыка // Курапаты // Форум
be pl en
Беларуская Салідарнасьць
Bielarus.net
Плятформа «Беларуская Салідарнасць»

Xто нясе адказнасьць за перамогу дыктатуры ў Беларусі?

(Зварот да кіраўніцтва Эўрапейскага Зьвязу і АБСЭ)

На працягу ўсяго 2004 года, пакуль антынародны і нелегітымны рэжым Лукашэнкі рыхтаваў свой незаконны “рэфэрэндум” і “выбарчую кампанію”, Кансэрватыўна-Хрысьціянская Партыя – БНФ неаднаразова зьвярталася да беларускага грамадзтва і палітычных партыяў Беларусі, папярэджваючы аб плянах прамаскоўскай дыктатуры. Задоўга да пачатку выбарчай кампаніі мы бачылі небясьпеку аб’яднаньня рэфэрэндуму, на які рэжым зьбіраўся вынесьці антыканстытуцыйныя патыньні, і выбараў у “палату прадстаўнікоў” лукашэнкаўскага псэўдапарляманту. Мы тлумачылі, што адзінай мэтай рэжыму ёсьць захаваньне ўлады Лукашэнкі шляхам падману беларускіх выбарцаў, прыцягненьня іх любымі спосабамі на выбарчыя ўчасткі, і таму ўлады сумясьцілі выбары з незаконным рэфэрэндумам. Ужо тады мы заявілі, што неабходным мэтадам супраціву дыктатуры ў гэтым становішчы ёсьць кампанія ўсенароднага байкоту выбарчага фарсу і незаконнага рэфэрэндуму. Менавіта байкот—непрыход на выбарчыя ўчасткі – не дазволіў бы рэжыму нахабна сфальсіфікаваць вынікі галасаваньня. З гэтымі тлумачэньнямі і заклікамі мы неаднаразова зьвярталіся на працягу 2004 г. да міжнароднай супольнасьці, кіраўніцтва дэмакратычных краінаў і кіраўніцтва Эўразьвязу і АБСЭ. На вялікі жаль, да нашых папярэджаньняў не прыслухаліся, нашу інфармацыю палічылі няважнай. Тым часам байкот можна было арганізаваць толькі супольнымі сіламі. І вось адбылося тое, пра што мы папярэджвалі грамадзтва і палітыкаў, абавязкам якіх ёсьць здольнасьць прадбачыць вынікі падзеяў і сваех дзеяньняў. Антыбеларуская дыктатура аб’яднала выбарчы фарс з антызаконным рэфэрэндумам, брутальна загнала мільёны людзей на выбарчыя ўчасткі і сфальшавала вынікі галасаваньня. І ўсё гэта адбывалася на вачах і з удзелам міжнародных назіральнікаў ад АБСЭ.

Мы заклікалі міжнародныя арганізацыі не пасылаць сваіх назіральнікаў на выбарчы фарс. Калі назіральнікі прыехалі, то наша Партыя прапанавала тэрмінова адклікаць іх і ня ўдзельнічаць у нахабным шоў дыктатуры (заява нашай Партыі “Не гуляйце з дыктатурай у дэмакратыю” ад 3 кастрычніка 2004 г.). Нават калі стала вядома, што рэжым пайшоў на адкрытае жульніцтва (выбарцы павінны былі расьпісвацца ў адным сьпісе і за выбары і за рэфэрэндум, і было ўжо немагчыма прыйсьці на выбары і ня браць удзелу ў антыканстытуцыйным рэфэрэндуме), АБСЭ не адклікала сваех назіральнікаў. АБСЭ заявіла, што “назіральнікі будуць назіраць толькі за выбарамі, і ня будуць назіраць за рэфэрэндумам” (які адбываўся ў той жа час, у тым жа месцы, з удзелам тых жа выбарцаў і тых жа камісіяў па галасаваньні). Сучасная аўтарытэтная міжнародная арганізацыя як АБСЭ ня мае права рабіць такія дэмагагічныя заявы, такая схаластыка недапушчальная на пачатку 21-га стагоддзя. Так можна згубіць увесь свой аўтарытэт, і самае галоўнае – гэтак можна канчаткова страціць сумленьне.

Антыдэмакратычны рэжым арганізаваў выбарчы фарс выключна па сваіх правілах. Рэжым меў поўны кантроль над сродкамі масавай інфармацыі. Так званая “незалежная прэса” таксама даўно знаходзіцца пад кантролем КГБ. Гэтыя СМІ разам з ворганамі прапаганды рэжыму актыўна заклікалі беларусаў на выбарчы фарс, дэмагагічна гукалі: “беларусы маюць права на дэмакратычныя выбары, скажам “Не!” дыктатуры”. Невялікія групоўкі, якія называюць сябе “дэмакратычнымі палітычнымі партыямі” выставілі на выбарчы фарс сваіх кандыдатаў, пастваралі кааліцыі і таксама актыўна заклікалі людзей ісьці на выбарчае ашукальніцтва. Яны яшчэ раз выканалі ролю правакатараў, арганізаваўшы прыход выбаршчыкаў на ўчасткі. Рэжым пакарыстаўся імі і адкінуў як адпрацаваны матар’ял (як вядома, ніводзін з гэтых “дэмакратычных кандыдатаў” ня быў дапушчаны ў псэўда-парлямант Лукашэнкі). Але пастаўленую перад імі задачу палітычныя авантурнікі выканалі – фарс, дзякуючы ім, набыў выгляд “дэмакратычнага змаганьня”.

Замест лягічнага міжнароднага байкоту і ізаляцыі рэжыму Лукашэнкі з мэтай не дазволіць яму падмануць і застрашыць беларускі народ, АБСЭ міжволі паспрыяла стварэньню зьнешняга антуражу дэмакратычнасьці выбарчага працэсу. Цяпер, пасьля сканчэньня выбарчага фарсу можна колькі заўгодна крытыкаваць і абвінавачваць рэжым за гвалт і выбарчыя падтасоўкі, але момант ужо страчаны. Рэжыму ня трэба цяпер міжнароднае прызнаньне легітымнасьці выбараў і рэфэрэндума. Лукашэнка (які узначальвае прарасейскую дыктатуру ў Беларусі) ужо цяпер спасылаецца на “усенародную падтрымку” і “волю народу”. Ужо цяпер Расея заявіла пра “перамогу дэмакратыі ў Беларусі”. Рэжым цынічна выкарыстаў АБСЭ разам з псэўда-апазыцыяй, каб забясьпечыць дэмакратычны выгляд рэфэрэндумнаму фарсу.

Машына выбарчай фальсіфікацыі працавала з нябачанай актыўнасьцю. Упершыню з савецкіх часоў рэжым арганізаваў сістэматычнае і татальнае запалохваньне выбарцаў па ўсёй краіне. Кіраўнікі прадпрыемстваў і навуковых установаў былі ў непасрэднай сувязі з тэрытарыяльнымі выбарчымі камісіямі і трымалі пад кантролем кожнага выбаршчыка, запалохваючы людзей звальненьнямі і рэпрэсіямі. Людзі, вымушаныя ісьці на выбарчыя ўчасткі, галасавалі супраць рэжыму – пра гэта сьведчаць усе грамадзкія апытаньні. Але забясьпечыўшы прыход выбаршчыкаў, рэжым атрымаў свабоду манэўра і сфальшаваў вынікі галасаваньня ў сваю карысьць.

Людзей, якія заклікалі да байкоту выбарчага фарсу, незаконна арыштоўвалі, штрафавалі, кідалі за краты. Мы паведамлялі пра брутальныя рэпрэсіі ўладаў супраць сяброў Кансэрватыўна-Хрысьціянскай Партыі – БНФ падчас выбарчай кампаніі, але не атрымалі ніякай рэакцыі з боку АБСЭ. Факты рэпрэсіяў супраць сяброў нашай Партыі не знайшлі месца ў справаздачах Місіі АБСЭ па назіраньні за выбарамі. Што гэта – палітычная сьлепата, падвойныя стандарты ў ацэнцы сітуацыі, уплывы расейскіх лоббі?

Мы спадзяемся, што АБСЭ акажа тэрміновую дапамогу ў вызваленьні з-за кратаў сябра Кансэрватыўна-Хрысьціянскай Партыі – БНФ сп. Уладзімера Плешчанкі, які быў незаконна арыштаваны 16 кастрычніка 2004 г. у Віцебску за выказваньне пазыцыі па байкоту выбарчага фарсу (на працягу апошняга месяца ён ужо другі раз кінуты рэжымам на 10 дзён за краты). Сп. Плешчанка, хворы на сэрца, перажыў за кратамі сардэчны прыступ, ягонае жыцьцё знаходзіцца ў небясьпецы. Патрэбна міжнародная дапамога для сп. Плешчанкі – мужнага барацьбіта за дэмакратыю, які на працягу апошніх гадоў шмат пацярпеў ад рэжыму за сваю нязломную барацьбу за правы чалавека і свабоду Беларусі.

У Беларусі адбылося непараўнальнае па маштабах крымінальнае злачынства. Рэжым Лукашэнкі падмануў беларускі народ, парушыў беларускія і міжнародныя законы. Міжнародная супольнасьць ужо цярер разглядае пытаньне міжнароднай ізаляцыі спраўцаў злачынства. Мы заклікаем арганізаваць міжнародную ізаляцыю антыдэмакратычнага рэжыму Лукашэнкі, структураў і канкрэтных чыноўнікаў, адказных за арганізацыю парушэньняў закона. Але ў той жа час недапушчальным ёсьць ізаляваньне беларускага народу – ахвяры рэжыму, нельга спыняць гуманітарныя і іншыя праграмы, якія дапамагаюць простым грамадзянам Беларусі.

Кіраўніцтва Кансэрватыўна-Хрысьціянскай Партыі – БНФ

20/10/2004 › Навіны


Навіны
Аналітыка
Актуаліі
Курапаты
Фотаархіў
Беларускія Ведамасьці
Змаганьне за Беларусь
Старонкі гісторыі
Цікавая літаратура

Пошук:




Каляндар:

Кастрычнік 2004
П А С Ч П С Н
« Вер   Ліс »
 123
45678910
11121314151617
18192021222324
25262728293031

Ідзі і глядзі:

НАРОДНАЯ ПРАГРАМА «ВОЛЬНАЯ БЕЛАРУСЬ»

С. Навумчык. «Сем гадоў Адраджэньня, альбо фрагмэнты найноўшай беларускай гісторыі (1988-1995)»

З. Пазьняк. «Прамаскоўскі рэжым»

Зянон. Паэма «Вялікае Княства»

З. Пазьняк. «Развагі пра беларускія справы»

Курапаты  — беларуская сьвятыня

Збор фактаў расейскага тэрору супраць беларусаў

З. Пазьняк. «Беларуска-расейская вайна»

«Новае Стагоддзе» (PDF)

«Гутаркі з Антонам Шукелойцем» (PDF)

Парсіваль

RSS


Беларуская Салідарнасьць:

ПЛЯТФОРМА НАРОДНАГА ЯДНАНЬНЯ.

1. Беларуская Салідарнасьць гэта ёсьць плятформа Беларускага Адраджэньня, форма ідэйнай лучнасьці паміж беларусамі і пазыцыя змаганьня з акупацыйным антыбеларускім рэжымам. Яе дэклярацыя салідарнасьці простая і надзейная, па прынцыпу Каліноўскага:
— Каго любіш?
— Люблю Беларусь.
— Дык узаемна.

2. Зьместам беларускага яднаньня ёсьць Беларуская нацыянальная дзяржава. Сымвалам Беларускай дзяржавы ёсьць нацыянальны Бел-Чырвона-Белы Сьцяг і гэрб Пагоня.

3. Беларуская Салідарнасьць стаіць за праўду Беларускага Адраджэньня, якое кажа: «Не правы чалавека — галоўнае для беларусаў, а незалежнасьць і свабода, бо не бывае „правоў чалавека“ пад акупацыяй». Трэба змагацца за свабоду і вызваленьне Беларусі, а не прасіць «правоў» у рэжыма і акупантаў. Акупанты правоў не даюць. Яны пакідаюць нам «права» быць рабочым матэрыялам дзеля іхных імпэрскіх інтарэсаў.

4. Беларуская Салідарнасьць сцьвярджае і абараняе дэмакратычныя каштоўнасьці народнага агульнанацыянальнага кшталту, якія мусяць шанаваць і бараніць усе беларусы перад небясьпекай агрэсіўнай пагрозы з Расеі і перад палітыкай антынацыянальнага рэжыму Лукашэнкі на Беларусі.

5. Беларуская Салідарнасьць мацуе грунт, кірунак дзеяньняў і ідэі беларускага змаганьня ў абарону беларускай незалежнасьці, мовы, культуры, беларускай нацыянальнай уласнасьці, маёмасьці і беларускай дзяржаўнай сістэмы дэмакратычнага існаваньня нацыі.

6. Усіх беларусаў як нацыю злучае і яднае беларуская мова, беларуская гісторыя, беларуская зямля, беларуская культура, беларуская дзяржава і ўся беларуская супольнасьць людзей — Беларускі Народ.

7. Усе беларусы, незалежна ад сьветапогляду і палітычных кірункаў, яднаюцца дзеля абароны беларускіх каштоўнасьцяў, беларускіх сымвалаў і беларускіх нацыянальных інтарэсаў.

8. Формы дзейнасьці Беларускай Салідарнасьці могуць быць рознымі, але заўсёды павінна ўлічвацца антыбеларуская палітыка прамаскоўскага рэжыму на Беларусі і пагроза нашаму нацыянальнаму, культурнаму і дзяржаўнаму існаваньню. Таму ва ўсіх справах — Беларусь перад усім. Трэба шанаваць усё беларускае. Шанаваць беларускую дзяржаўнасьць. Шанаваць беларускую мову і беларускі народ. Шанаваць беларускую зямлю і беларускую культуру. Шанаваць здабытак народнай працы. Беларус беларуса мусіць бараніць перад небясьпекай. Беларус беларусу мусіць дапамагаць. Беларус беларуса павінен падтрымліваць паўсюдна на Беларусі і ва ўсім сьвеце.


Сябры й партнэры:

Кансэрватыўна-Хрысьціянская Партыя - БНФ

Народная Перамога

[ Усе сябры ]




Лічыльнік:


Беларуская Салідарнасьць // Усе правы абароненыя // 2000—2020
Сувязь