Bielarus.net Навіны // Аналітыка // Курапаты // Форум
be pl en
Беларуская Салідарнасьць
Bielarus.net
Плятформа «Беларуская Салідарнасць»

Беларускі Нацыянальна-Вызвольны Рух

Зянон Пазьняк
29 верасьня 2002 г. Менск
Мітынг у абарону незалежнасьці Беларусі ад пагрозы расейскай агрэсіі

Дарагія землякі, дарагія беларусы! Вітаю вас у нашай дарагой Бацькаўшчыне!
Нам трэба гаварыць і думаць пра галоўнае: пра волю народа і пра запесьпячэньне незалежнасьці нашай дзяржавы.
Ужо даўно, пачынаючы з 1994 года, над Беларусяй вісіць пагроза расейскай палітычнай агрэсіі.

Расея ўвесь час праводзіць палітыку, накіраваную на захоп нашай краіны, маёмасьці, эканомікі і тэрыторыі. Пра гэта я казаў яшчэ дзевяць гадоў таму, калі гэтая новая акупацыйная палітыка Расеі супраць Беларусі толькі пачыналася. Цяпер яна дайшла да таго, што Масква адкрыта аб’явіла пра свае пляны анэксіі Беларусі. Гэта ёсьць грубы ўльтыматум, агрэсіўная палітыка, нахабны выклік усяму беларускаму грамадзтву.

Дарагія сябры, я хачу зьвярнуць вашу ўвагу на спосабы, якімі карыстаюцца непрыяцелі, каб ашукаць беларусаў.

Вось яны аб’явілі ўльтыматум аб намерах ліквідаваць нашу дзяржаву і, упэўненыя ў беспакаранасьці, кажуць: “Выбірайце: альбо анэксія адразу, альбо паступова”. (Гэта значыць спачатку “саюз”, а потым анэксія).

Гэта тое самае, калі бандыт зь вялікай дарогі кажа чалавеку: выбірай: альбо куля, альбо вяроўка.

Але тут няма выбару. Тут няма чаго выбіраць. У такім выпадку трэба пляжыць бандыта паміж вачэй, і чым мацней – тым лепш. Інакш – бандзюга заб’е цябе.

Выглядае, што беларусаў лічаць за прасьцякоў і хочуць ашукаць, прымусіць, каб людзі выбіралі паміж куляй і вяроўкай (гэта значыць паміж анэксіяй і “саюзам”).

Два артысты-кагэбісты быццам бы спрачаюцца ва ўсіх на віду: адзін, маўляў, за “анэксію”, другі – за “саюз”. Адбываецца публічны бессаромны гандаль нашай краінай. Гандлююцца два хаўрусьнікі. Прытым Лукашэнка стаў “сувэрэнітэтчыкам”, узяў на сябе ролю “патрыёта”. Ён, бачыце, ужо за незалежнасьць і супраць анэксіі, але – за “саюз”.

І гэта ў той час, калі самы расейцы адкрыта кажуць, што “саюз” – гэта таксама шлях да анэксіі Беларусі, толькі павольны.

А тым часам за плячыма беларускага народа, ціха і сьпешна, падрыхтоўваецца ліквідацыя беларускіх грошай і пераход на расейскія рублі, узмацняюць расейскі кантроль над беларускай арміяй, дзяржаўнай мяжой, палітыкай, эканомікай і ўладай. Поўным ходам рыхтуецца захоп Беларусі. І ўсё гэта расейцы робяць разам з Лукашэнкам, які клапоціцца толькі аб тым, каб выгандляваць сабе ад прадажы Беларусі пабольш.

Але лёгіка расейскай палітыкі такая, што калі б яны пры дапамозе Лукашэнкі загрэблі на Беларусі ўсё, што можна загрэбці, то Лукашэнка ім быў бы ўжо непатрэбны. І тады яны падтрымалі б новага стаўленьніка Масквы, якога-небудзь “дэмакрата”, тыпу Уладзімера Ганчарыка, які здаў бы Беларусь задарма.

Якія высновы мы мусім зрабіць і што мы павінны ведаць?

Першае, гэта тое, што Лукашэнка ня ёсьць абаронцам незалежнасьці Беларусі. Пуцін і Лукашэнка – адна кампанія. Яны робяць супольную палітыку па ліквідацыі незалежнасьці нашай краіны. Беларусы не павінны даць сябе ашукаць.

Другое. Беларусы не павінны ўдзельнічаць ні ў якіх выбарах і ні ў якіх рэфэрэндумах, арганізаваных існуючым рэжымам.

Масква і Лукашэнка хочуць загнаць беларусаў на рэфэрэндум аб “інтэграцыі” з Расеяй, каб скарыстаць народ у ліквідацыі незалежнасьці.

Памятайма, што на Беларусі народ адлучаны ад фармаваньня ўлады, бо рэжым стварыў адмысловую і некантралюемую сістэму несправядлівых выбараў і фальсіфікацыі галасаваньня. Як бы ні галасавалі выбаршчыкі, любыя выбары і любы рэфэрэндум рэжым сфальсіфікуе ў сваіх інтарэсах.

Дастаткова хоць малой колькасьці людзей пайсьці галасаваць, як рэжым скарыстае гэта, перакруціць і аб’явіць такія вынікі “галасаваньня”, якія яму трэба.

Таму нельга браць удзел у выбарах і рэфэрэндумах. Нельга галасаваць. Нельга даваць падставу нягоднікам выязджаць на плячах народа, плюючы яму ў твар.

Трэцяе. Усім беларусам трэба абараняць свабоду і незалежнасьць Радзімы. Гэта наш канстытуцыйны абавязак. За намі праўда! За намі Права і Канстытуцыя.

Стварайце Камітэты Абароны Беларусі ад расейскай агрэсіі, а там, дзе яны ўжо створаныя, — уступайце ў іх. Гэта ёсьць шанс абараніцца і перамагчы, стварыць глыбокі і шырокі беларускі рух супраціўленьня ад агрэсіі з Расеі.

Сіла ў нас самых. Падтрымлівайце Камітэты Абароны, пашырайце і прапагандуйце ідэі аб іх стварэньні. Падтрымлівайце Беларускі Нацыянальна-Вызвольны Рух і ягоныя арганізацыі. Беларусь была, ёсьць і будзе, пакуль мы жывём і змагаемся за нашу волю.

Дык жа няхай вечна жыве наша незалежная, вольная і дарагая Бацькаўшчына!

Зянон ПАЗЬНЯК

29/9/2002 › Змаганьне за Беларусь


Навіны
Аналітыка
Актуаліі
Курапаты
Фотаархіў
Беларускія Ведамасьці
Змаганьне за Беларусь
Старонкі гісторыі
Цікавая літаратура

Пошук:




Каляндар:

Верасень 2002
П А С Ч П С Н
« Жні   Люты »
 1
2345678
9101112131415
16171819202122
23242526272829
30  

Ідзі і глядзі:

НАРОДНАЯ ПРАГРАМА «ВОЛЬНАЯ БЕЛАРУСЬ»

С. Навумчык. «Сем гадоў Адраджэньня, альбо фрагмэнты найноўшай беларускай гісторыі (1988-1995)»

З. Пазьняк. «Прамаскоўскі рэжым»

Зянон. Паэма «Вялікае Княства»

З. Пазьняк. «Развагі пра беларускія справы»

Курапаты  — беларуская сьвятыня

Збор фактаў расейскага тэрору супраць беларусаў

З. Пазьняк. «Беларуска-расейская вайна»

«Новае Стагоддзе» (PDF)

«Гутаркі з Антонам Шукелойцем» (PDF)

Парсіваль

RSS


Беларуская Салідарнасьць:

ПЛЯТФОРМА НАРОДНАГА ЯДНАНЬНЯ.

1. Беларуская Салідарнасьць гэта ёсьць плятформа Беларускага Адраджэньня, форма ідэйнай лучнасьці паміж беларусамі і пазыцыя змаганьня з акупацыйным антыбеларускім рэжымам. Яе дэклярацыя салідарнасьці простая і надзейная, па прынцыпу Каліноўскага:
— Каго любіш?
— Люблю Беларусь.
— Дык узаемна.

2. Зьместам беларускага яднаньня ёсьць Беларуская нацыянальная дзяржава. Сымвалам Беларускай дзяржавы ёсьць нацыянальны Бел-Чырвона-Белы Сьцяг і гэрб Пагоня.

3. Беларуская Салідарнасьць стаіць за праўду Беларускага Адраджэньня, якое кажа: «Не правы чалавека — галоўнае для беларусаў, а незалежнасьць і свабода, бо не бывае „правоў чалавека“ пад акупацыяй». Трэба змагацца за свабоду і вызваленьне Беларусі, а не прасіць «правоў» у рэжыма і акупантаў. Акупанты правоў не даюць. Яны пакідаюць нам «права» быць рабочым матэрыялам дзеля іхных імпэрскіх інтарэсаў.

4. Беларуская Салідарнасьць сцьвярджае і абараняе дэмакратычныя каштоўнасьці народнага агульнанацыянальнага кшталту, якія мусяць шанаваць і бараніць усе беларусы перад небясьпекай агрэсіўнай пагрозы з Расеі і перад палітыкай антынацыянальнага рэжыму Лукашэнкі на Беларусі.

5. Беларуская Салідарнасьць мацуе грунт, кірунак дзеяньняў і ідэі беларускага змаганьня ў абарону беларускай незалежнасьці, мовы, культуры, беларускай нацыянальнай уласнасьці, маёмасьці і беларускай дзяржаўнай сістэмы дэмакратычнага існаваньня нацыі.

6. Усіх беларусаў як нацыю злучае і яднае беларуская мова, беларуская гісторыя, беларуская зямля, беларуская культура, беларуская дзяржава і ўся беларуская супольнасьць людзей — Беларускі Народ.

7. Усе беларусы, незалежна ад сьветапогляду і палітычных кірункаў, яднаюцца дзеля абароны беларускіх каштоўнасьцяў, беларускіх сымвалаў і беларускіх нацыянальных інтарэсаў.

8. Формы дзейнасьці Беларускай Салідарнасьці могуць быць рознымі, але заўсёды павінна ўлічвацца антыбеларуская палітыка прамаскоўскага рэжыму на Беларусі і пагроза нашаму нацыянальнаму, культурнаму і дзяржаўнаму існаваньню. Таму ва ўсіх справах — Беларусь перад усім. Трэба шанаваць усё беларускае. Шанаваць беларускую дзяржаўнасьць. Шанаваць беларускую мову і беларускі народ. Шанаваць беларускую зямлю і беларускую культуру. Шанаваць здабытак народнай працы. Беларус беларуса мусіць бараніць перад небясьпекай. Беларус беларусу мусіць дапамагаць. Беларус беларуса павінен падтрымліваць паўсюдна на Беларусі і ва ўсім сьвеце.


Сябры й партнэры:

Кансэрватыўна-Хрысьціянская Партыя - БНФ

Народная Перамога

[ Усе сябры ]




Лічыльнік:


Беларуская Салідарнасьць // Усе правы абароненыя // 2000—2020
Сувязь