13 сакавіка сёлета газэта “Народная Воля” апублікавала мой артыкул у форме звароту да пэдагогаў і псыхолагаў афіцыйнай сістэмы адукацыі і надала яму назву: - “Хто дэнацыяналізуе беларусаў?”. Я ўдзячны галоўнаму рэдактару Сярэдзічу І.П. за публікацыю, але мушу пракаментаваць істотныя “стылёвыя” праўкі, якія без узгадненьня, унесены рэдакцыяй. Галоўнае, што істотна зьмяніла накіраванасьць артыкулу, гэта дадатак рэдакцыяй апошняга сказу: - “І вам, пэдагогі, ня сорамна?”. Гэтым сказам рэдакцыя газэты зрабіла спробу абнізіць праблему, якую стварыла афіцыйная пэдагогіка, перавесьці заканадаўчую адказнасьць у бок эмацыйнай. Таксама, назва “Хто дэнацыяналізуе беларусаў?”, мякка кажучы, некарэктная. Тут ня можа быць пытаньня. Дэнацыяналізуе беларусаў рэжым унутранай акупацыі пад кантролем Масквы. Пэдагогі зьяўляюцца актыўнымі праваднікамі асіміляцыі і, канешне, нясуць адказнасьць за свае разбуральныя дзеяньні. Тут публікую артыкул у арыгінале, які быў накіраваны ў газэту.
Пэдагогам і псыхолагам
(У першую чаргу для тых, хто працуе ў ВНУ і рыхтуе армію настаўнікаў і выхавацеляў) Спадарства, праўдзівыя вынікі вашай дзейнасьці выказала метадыст Акадэміі пасьлядыпломнай адукацыі Ганна ДАБРЫНЕЎСКАЯ,.
“… нягледзячы на каласальныя намаганні, затраты, інавацыі, рэкамендацыі і пастановы, дасягненні навукі і наяўнасць эфектыўных адукацыйных практык, імкненні і дарослых, і дзяцей да высокай якасці адукацыі, высокага ўзроўню сучаснай падрыхтоўкі моладзі да прафесійнай дзейнасці, прарыву ў адукацыі ўсё ж такі няма. А колькасць праблем не змяншаецца, прычым у некаторых сем’ях і школах па пэўных напрамках па меры сталення дзяцей нарастае.” (“Навучаючы бацькоў, мы вучымся самі” https://nastgaz.by/navuchayuchy-batskou-my-vuchymsya-sami/)
Паспрабуем прэпарыраваць і параўнаць з рэаліямі гэтае вельмі супярэчнае выказваньне: -каласальныя намаганні, затраты – гэта сапраўды так, існуюць інстытуты, вертыкаль упраўленьняў, міністэрства, чыноўнікі адказныя за выхаваньне сеткі школ і садкоў, -інавацыі – яны магчыма ёсьць, але лічыць іх карыснымі нельга ў сувязі з адмоўнымі вынікамі, -рэкамендацыі і пастановы – тут сапраўды тысячы тон выкарыстанай паперы, рабочага часу, намаганьняў, затрат, -дасягненні навукі – дасягненьні сусветнай навукі ёсьць, вось толькі да нашай адукацыі яны не даходзяць, -наяўнасць эфектыўных адукацыйных практык – вось гэтае сцьверджаньне, з улікам вынікаў, зьяўляецца непраўдзівым, -высокі ўзровень сучаснай падрыхтоўкі моладзі да прафесійнай дзейнасці – не адпавядае рэальным сучасным патрабаваньням .
І як вынік, што зьяўляецца галоўнай і небясьпечнай праўдай для беларускіх сем’яў - прарыву ў адукацыі ўсё ж такі няма, колькасць праблем не змяншаецца … а нават павялічваецца.
Спадарства, пэдагогі і псыхолагі, ва ўсіх сваіх мэтодыках вы сьцьвярджаеце, што ў сваёй працы абапіраецеся на сучасныя навуковыя дасягненьні і мэтады. Давайце вызначацца.
Вам вядома, што: - “Неад’емнай часткай для любой навукі зьяўляецца патрабаваньне аб’ектыўнасьці, якая выключае суб’ектыўнае тлумачэньне вынікаў. Не павінны прымацца на веру якія-небудзь сцьверджаньні , нават калі яны належаць аўтарытэтным вучоным. Для забесьпячэньня незалежнай праверкі праводзіцца дакументаваньне назіраньняў, забясьпечваецца даступнасьць для іншых навукоўцаў усіх дадзеных, мэтодык і вынікаў дасьледваньняў. Гэта дазваляе ня толькі атрымаць дадатковае пацьверджаньне шляхам адэкватнага паўтору эксперыментаў, але і крытычнай ацэнкі ступені адэкватнасьці (валіднасьці) экспэрымэнтаў і вынікаў у адносінах да тэорыі якая правяраецца.” (Wikipedia)
У сувязі з тым, што вы ўпарта працягваеце асіміляцыю беларусаў і зьяўляецеся адным з асноўных інструмэнтаў гэтага працэса, ўзьнікаюць пытаньні: -на якія навуковыя дадзеныя вы абапіраецеся адмаўляючы звалюцыю разумовых здольнасьцяў (станоўчая эвалюцыя разумовых здольнасьцяў прадугледжвае культурную пераемнасьць пакаленьняў), -вы сьцьвярджаеце, што калі беларускае дзіця авалодае першапачаткова “русскім языком”, то ён будзе для гэтага дзіця родным. А як жа быць з адметнасьцю марфалогіі структураў мозгоў, напрацаванай сотнямі пакаленьняў продкаў праз нашу мову і нашу культуру?
- Вы будзеце сьцьвярджаць, што “русскій язык” эфектыўна кладзецца на гэтую структуру? Што гэта не ўплывае на разумовыя здольнасьці? Хто ставіў такія эксперыменты, хто праводзіў такія дасьледваньні? Дзе вынікі?
Прыняўшы на веру навукова неабгрунтаваныя сьцьверджаньні расейскіх “вучоных”, вы парушылі прыродную экалогію разумовай прасторы беларусаў. Эвалюцыя разумовых здольнасьцяў чалавека (як і ў цэлым эвалюцыя) мае два кірункі: станоўчы і адмоўны. Асіміляцыя, якая падтрымліваецца вашай дзейнасьцю, паставіла беларусаў на адмоўны эвалюцыйны шлях.
На вас, як і на армію чыноўнікаў і рознага роду “ідэолагаў” кантралюючых вашу дзейнасьць, таксама кладзецца адказнасьць за разбуральныя працэсы нацыянальнай беларускай грамады і дзяржавы.
Гэта праз вас ідзе галоўны паток чужароднай патагеннай інфэкцыі мазгоў беларусаў (што такое мэмы, мэмэтыка вам вядома). Гэта вашымі псэўданавуковымі сцьверджаньнямі і палажэньнямі ўзброена чыноўная вертыкаль, якая стварае кропкавыя рэзервацыі для беларускіх сем’яў – адзін дзіцячы садок на раён, адна беларускамоўная школа (ці нават клас) на горад і г.д.
Што рабіць? Вы ж лічыце сябе разумнымі людзьмі, удзельнічаеце ў міжнародных канфэрэнцыях, семінарах, запрашаеце замежных навукоўцаў, праз інтэрнэт даступная ўся навуковая інфармацыя. Адказ ляжыць на паверхні. Дастаткова паглядзець на Фінлядыю, там таксама дзве дзяржаўныя мовы, але дзетак у фінскіх сем’ях выхоўваюць па-фінску, у швэдскіх сем’ях па-швэдцку, Або возьмем Швэйцарыю: выхаваньне ў нямецкіх сем’я па-нямецку, італьянскіх сем’ях па-італьянску, у французскіх па-французску. Прыклады можна працягваць, а там дзе парушаецца прыродная экалогія моўнай культуры, відавочныя працэсы разумовай дэградацыі.
Сяргей Папкоў, Намеснік старшыні КХП-БНФ Тэл, 375 29 661 51 43 Э-по: bkadradzennie@gmail.com