16 траўня славацкая газэта “SME” апублікавала артыкул пад тытулам “Эўрадэпутата ад руху Jobbik абвінавачваюць у шпіянажы на Расею”. Вось гэты артыкул:
Бэла Ковач сустракаўся з расейскімі дыпламатамі і адобрыў рэфэрэндум у Крыме. Ёсьць патрабаваньні пазбавіць яго імунітэта.
Будапэшт. Угорская пракуратура зрабіла запыт у Эўрапарлямант аб пазбаўленьні імунітэту дэпутата ад крайне правага руху Jobbik Бэлы Ковача.
Прычынай ёсьць падазрэньні, што ён працуе ў якасьці расейскага шпіёна, інфармавала ў чацьвер газэта “Magyar Nemzet”.
Пракуратура мае выразныя доказы таго, што Ковач займаўся шпіянажам у эўрапейскіх інстытуцыях на карысьць Масквы. Эўрадэпутат усе абвінавачваньні рэзка абвяргае.
“Я ніколі ня быў членам вугорскай або якой іншай замежнай сакрэтнай службы. Ніколі на іх не працаваў і ніколі яны са мной не кантактавалі”, сказаў Ковач на прэс-канфэрэнцыі ў Будапэшце.
Паводле “Magyar Nemzet”, вугорскія разьведвальныя службы пачалі займацца палітыкам пасьля таго, як ён правёў шмат сустрэчаў “канспірацыйнага характару” з расейскімі дыпляматамі.
Ковач нядаўна быў членам дэлегацыі эўрадэпутатаў, якая назірала ў Крыме за ходам рэфэрэндума аб абвяшчэньні незалежнасьці ад Украіны.
Сябра руху Jobbik пры гэтым спрэчнае ўсенароднае галасаваньне ацаніў як легітымнае.
Пераклаў з славацкай Валеры Буйвал
Крыніца: http://www.sme.sk/c/7204629/europoslanca-jobbiku-vinia-zo-spionaze-pre-rusko.html
Гэты Jobbik узьнік усяго некалькі гадоў таму, адразу пасьля таго, як ляснуў рэжым верных Маскве камсамольцаў Дзюрчаня. Як кажуць падлеткі, рух адразу пачаў “паказваць сваю круцізну”: шэсьці пад агрэсіўнымі лёзунгамі, патрабаваньні аднаўленьня “вялікай Вугоршчыны ад мора да мора”, антысэміцкія, антыславацкія, антырумынскія заклікі. І вось аказалася, што “крутыя” пры ўсім пры гэтым яркія “русафілы” (ну хаця б некага любяць пасярод сваіх фобій). Цяпер высьвятляецца з чыіх рук карміліся гэтыя “резкіе парні”. Зразумела, што Масква зацікаўлена ў дэстабілізацыі эўрапейскіх краін.
Янка Базыль