“У Расеі на межах могуць быць толькі ворагі або васалы”.

Як і ў Беларусі, ва Украіне адбываецца працэс нацыянальна-дзяржаўнага выбару: жыць пад прыгнётам азіяцкай (у горшым сэнсе слова) Расеі або ў сям’і цывілізаваных эўрапейскіх народаў. Украінскія патрыёты гэты выбар рабілі спрадвечна: на карысьць эўрапейскіх каштоўнасьцяў хрысьціянскай Украіны. Васальны рэжым Януковіча таксама зрабіў свой выбар – разам з Расеяй, якая “так і не пазбылася ад прымітыўнай структуры эканомікі, не пераарыентавала вытворчасьць на рэальныя патрэбы людзей”. Мільёны людзей у сьвеце таксама ўражаны маральным калапсам, які ахапіў насельніцтва расейскай імпэрыі, яе духоўным заняпадам (нягледзячы на ўсе прэтэнзіі ў стылі “святой Русі”). Украіна асэнсоўвае драматычнае становішча, у якім яна апынулася ў сувязі з прыходам да ўлады прамаскоўскага рэжыму.
Публікуем два матэр’ялы на гэтую тэму, зьмешчаныя ў інтэрнэт-выданьні партыі “Наша Украіна”.
***

“Наша Украіна”: Нельга ісьці ў Эўропу “разам” з краінай, якая сьцьвярджалася на супрацьстаяньні з эўрапейскім сьветам

Апошнія заявы прадстаўнікоў уладнай каманды пачынаюць выклікаць апасеньні наконт іх выразнай некампетэнтнасьці і незразуменьня рэальнай сытуацыі ва ўкраінска-расейскіх адносінах.
Так, віцэ-прэм’ер-міністар Украіны па пытаньнях эканомікі Сяргей Цігіпка нядаўна заявіў, што “узмацненьне адносін з Расеяй – гэта такі ж прыярытэт, як і супрацоўніцтва з Эўропай” і што, аказваецца, “цяпер адзін з шляхоў нармалізацыі адносінаў” – праект “моцнага індустрыяльнага прарыву… палягае ў стварэньні максімальна спрыяльных умоваў для высокатэхналагічнай прамысловай каапэрацыі”.
Падобныя камэнтары можа даваць толькі чалавек, які зусім не разумее, у якой “высокатэхналагічнай сытуацыі знаходзіцца цяперашняя Расея, або намагаецца сьведама ўвесьці ў зман украінцаў.
Сытуацыю, у якой знаходзіцца цяперашняя Расея, досыць выразна і ёміста апісаў прэзыдэнт РФ Д. Медведев у сваім апошнім пасланьні да Фэдэральнага сходу РФ. Ён падкрэсьліў, што Расея “так і не пазбылася ад прымітыўнай структуры эканомікі, ад прыніжаючай сыравіннай залежнасьці, не пераарыентавала вытворчасьць на рэальныя патрэбы людзей. Звычка жыць за кошт экспарту, як і раней, тармозіць інавацыйнае разьвіцьцё. Расейскі бізнэс дагэтуль лічіць лепшым гандляваць тым, што створана ў іншых краінах, а канкурэнтназдольнасьць нашай прадукцыі ганебна нізкая”.
Але расейсцы прынамсі выразна вызначылі для сябе стратэгічныя прыярытэты: “набыцьцё Расеяй статусу сусьветнай дзяржавы” і “стварэньне ўмоваў для дасягненьня Расеяй лідыруючых пазыцыяў у глабальнай эканоміцы”.
Менавіта для гэтага ім патрэбныя харкаўскія ўгоды па Чарнаморскім Флёце і стварэньне сумесных расейска-украінскіх прадпрыемстваў авіябудаўніцтва, ядзернай энэргетыкі і суднабудаўніцтва пад кантролем расейцаў.
Сутнасьць цяперашняга стратэгічнага курсу, які праводзіць пракрамлёўскі рэжым Віктара Януковіча, чамусьці зводзіцца да пасьлядоўных намаганьняў заслупіць за Украінай статус “шасьцёркі на падхваце”.
Аднак прыклад расейска-беларускай газавай вайны выразна паказвае, якое стаўленьне Расеі да тых, каго яна лічыць сваімі сатэлітамі. Яна іх проста выкарыстоўвае ў сваіх інтарэсах, па-сяброўску пляскаючы па плячы.
Любыя спробы пераглядзець стратэгічныя прыярытэты ўкраінскай палітыкі абсалютна беспэрспэктыўныя. Бо Украіна гістарычна ёсьць эўрапейскай краінай, а Расея на працягу ўсёй сваёй гісторыі сьцьвярджалася як вялікая дзяржава менавіта ў супрацьстаяньні з эўрапейскім сьветам.
Калі гэтага не разумеюць найвышэйшыя чыноўнікі ва Украіне – вынікае пытаньне пра іхную адпаведнасьць пасадзе.

Крыніца: http://www.razom.org.ua/news/8732

***
Задавальненьне патрабаваньняў агрэсара
толькі распальвае ягоныя апэтыты

Здаўна вядома, што “у Расеі на межах могуць быць толькі ворагі або васалы”. Гэтае крылатае выказваньне, сфармуляванае яшчэ ў часы імпэрыяў, актуальнае і ў наш час. Менш за паўгода “новых адносінаў” з Расеяй пацьвердзілі, што Украіна з “няўступлівага суседа” часоў жорсткага адстойваньня нацыянальных інтарэсаў камандай Віктара Юшчанкі ператварылася ў гатовага прыслугоўваць васала, які схільны прызнаць як “адпаведную нацыянальным інтарэсам Украіны” любую прыхамаць свайго расейскага “патрона” .

Крыніца: http://www.razom.org.ua/
(Пераклад з украінскай)

6/7/2010 › Навіны