Расея ўвяла транспартную блякаду Грузіі. Як вы да гэтага ставіцеся? На пытаньне адказваюць жыхары Гомелю. (з апытаньня Радыё “Свабода”)
(Маладая кабета: ) “У гэтай сытуацыі, як Расея, так і Грузія павялі сябе ня вельмі адэкватна. Грузія павінна была выслаць цягам 24 гадзінаў гэтых афіцэраў, калі іх ужо ў нечым западозрылі. А Расея не павінна нагнятаць вайсковай гістэрыі, якая нагадвае час халоднай вайны”.
(Студэнт: ) “Катэгарычна супраць блякады”.
(Мужчына: ) “Яны ня маюць рацыі, канечне. Расея — гэта Расея, а Грузія ёсьць Грузія”.
(Мужчына: ) “У Грузіі ўжо былі ў свой час расейскія сапэрныя лапаткі, а цяпер учыненая блякада. Расея заўсёды ставілася так да сваіх “малодшых братоў”, так яна будзе ставіцца й да Беларусі”.
(Студэнт: ) “У Расеі свая палітыка. Нам што да яе? Важна, каб нам было добра”.
(Мужчына: ) “Транспартная блякада Грузіі, якую ўчыніла Расея, гэта і папярэджаньне Беларусі. Расейская дыпляматыя заўсёды прымяняла дубіну, там дзе патрэбныя былі перамовы”.
(Пэнсіянэр: ) “Расея ня можа навязваць камусьці сваёй волі. Відаць, ёй выгадна паўплываць на Грузію, каб тая плясала пад Расею”.
(Малады мужчына: ) “У мяне адмоўнае стаўленьне. Рэч у тым, што Расея мае імпэрскія амбіцыі. І тут відавочна, што яна імкнецца нейкім чынам задушыць Грузію”
Паводле Радыё “Свабода”