Bielarus.net Навіны // Аналітыка // Курапаты
be pl en
Беларуская Салідарнасьць
Bielarus.net
Плятформа «Беларуская Салідарнасць»

Віталь Портнікаў: Тытанік пераможцаў

Арышт расейскага міністра эканомікі Аляксея Улюкаева можа азначаць пачатак вайны за кантроль над зьменай улады ў Расеі.

Арышт міністра эканамічнага разьвіцьця Расейскай Фэдэрацыі Аляксея Улюкаева мне ўдалося прадказаць яшчэ два гады таму, падчас так званай крымскай прамовы Уладзіміра Пуціна. Тады я пісаў, што чыноўнікі, якія сабраліся ў Крамлі біць у ладкі “вяртаньню Крыма”, нат не падазраюць свайго падабенства са знакамітым сталінскім “зьездам пераможцаў”. Дэлегаты XVII зьезду ВКП (б), якія пляскалі ў ладкі Сталіну, маглі адчуваць сябе самымі сапраўднымі трыюмфатарамі – калектывізацыя і індустрыялізацыя краіны праведзены, унутрыпартыйныя апазыцыі разгромлены і каюцца, савецкі ўрад прызнаны ва ўсім сьвеце. Але ўжо праз тры гады большая частка гэтага зьезду будзе расстраляна, жонак някемлівых пераможцаў – згвалцяць і накіруюць у ГУЛАГ, дзяцей – у прытулкі. Перамога абярнулася поўным крахам трыюмфуючага апарата.

“Крымскіх пераможцаў” чакае той жа сумны лёс. Пагадзіўшыся з ператварэньнем Расеі ў краіну-ізгоя, яны аўтаматычна ўзмоцнілі і ўсяўладдзе першай асобы, і магчымасьці расперазаных сілавікоў зь ягонага атачэньня. А з-за таго, што грошай для раскраданьня краіны застаецца ўсё менш і менш, прэтэндэнты на такое разрабаваньне будуць адштурхваць адзін аднаго ад ночвы, як прагныя гіены. І ў хуткім часе перакуляць дагары нагамі саму ночву.

Для расейскіх мэдыяў арышт міністра эканамічнага разьвіцьця Расеі – знакавая падзея. Вядучыя інтэрнэт-выданьні гэтай краіны вядуць бесперапынны рэпартаж ў прамым эфіры, нібы йдзецца пра стыхійнае бедства, бо ніколі яшчэ настолькі высокапастаўленага чыноўніка не арыштоўвалі ўначы падчас спэцыяльнай апэрацыі, што, безумоўна, выразна нагадвае 1937 год.

Пры гэтым усе вольныя ад прапагандысцкіх абавязацельстваў людзі не сумняваюцца, што Улюкаева банальна падставілі, што ніякага хабару ў два мільёны даляраў ад кампаніі Роснефть проста не было. Пра тое, як Улюкаева ня бралі з наяўным, сьведчыць і рэпартаж інфармаванай Новой газеты. Сілавікі, зразумела, гэта абвяргаюць, але ніякіх доказаў адваротнага не прадстаўляюць. Магчыма, што ворагі Улюкаева разьлічваюць дамовіцца з міністрам і інсцэніраваць арышт пры дачы хабару заднім рахункам.

Але зразумела, што чыноўніку ўзроўню Улюкаева зусім не патрэбна было вымагаць – ды яшчэ і з пагрозамі – нейкіх два мільёны даляраў ад аднаго з самых уплывовых пуцінскіх паплечнікаў Ігара Сечына. Дэкларацыя аб даходах Улюкаева – як і любога іншага расейскага чыноўніка – знаходзіцца ў публічным доступе, і любы непрадузяты чалавек можа пераканацца, што для міністра два мільёны даляраў – выразна ня тыя грошы. Але акрамя абнародаванай дэкларацыі вядома, што прозьвішча Улюкаева фігуравала і ў панамскім дасье, так што кіраўнік расейскага эканамічнага ведамства – вельмі багаты чалавек. І да таго ж знаходзіцца ва ўладзе ўжо некалькі дзесяцігоддзяў, з часоў гайдараўскх рэформаў, актыўным удзельнікам якіх ён быў. Такія людзі да апошняга часу лічыліся ў Расеі недакранальнымі.

Што здарылася на самой справе, мы даведаемся толькі з часам, калі стануць зразумелымі наступствы затрыманьня міністра. На дадзены момант можна разглядаць цэлы шэраг вэрсій.

Першая зь іх – барацьба за плыні, якія плытчэюць. З-за таго, што зьдзелка вакол кампаніі «Башнефть», фактычна, завершана, можна меркаваць, што йдзецца пра мінулае, а не пра будучыню. І што сілавікі проста вырашылі выкарыстаць гісторыю з продажам Башнефті для ўзмацненьня ўласнага ўплыву. На карысьць гэтай вэрсіі гаворыць той факт, што да самога “давальніка хабару” Ігара Сечына сьледства ня мае ніякіх прэтэнзій, а ручны сечынскі гёбэльс – Міхаіл Леонцеў – назваў затрыманьне міністра эканомікі “бліскучай працай”. Акрамя таго, затрыманьнем Улюкаева займаліся сьледчыя са Сьледчага камітэту Расейскай Фэдэрацыі, аб адстаўцы кіраўніка якога, Аляксандра Бастрыкіна, у апошнія месяцы гавораць як пра зьдзейсьнены факт. Такім чынам, адстаўка Улюкаева можа адкрыць пэрыяд вайны за кантроль над тым, што яшчэ засталося ў Расеі – вайны не на жыцьцё, а на сьмерць.

Другая вэрсія можа быць зьвязана з магчымай зьменай улады ў Расеі, чуткі пра якую таксама цыркулююць ў апошнія тыдні і зьвязваюцца з аслабленьнем уплыву альбо з пагаршэньнем стану здароўя Уладзіміра Пуціна. Нават калі гаворка можа весьціся пра часовае адхіленьне ад прыняцьця актуальных рашэньняў, пасада старшыні ўраду ў гэтай сытуацыі набудзе ключавое значэньне. А старшынёй ўраду Расеі зьяўляецца, як вядома, Дзімітры Медведеў, які ўжо працаваў прэзыдэнтам краіны і на гэтай пасадзе праявіў пэўную самастойнасьць – не ад Пуціна, а ад сілавікоў. У гэтай сытуацыі імкненьне да прызначэньня свайго прэм’ера можа быць галоўнай матывацыяй сілавікоў. На карысьць гэтай вэрсіі гаворыць той факт, што нават пасьля затрыманьня Улюкаева Пуцін, па словах ягонага прэс-сакратара, не сьпяшаецца прымаць рашэньне аб адстаўцы міністра і лічыць абсурднай – вось важнае слова! – ідэю аб калектыўнай адказнасьці і адстаўцы ўсяго ўраду. Такім чынам, Пуцін у чарговы раз даў зразумець, што працягвае цалкам спалягаць на Медведева.

Але ўнутранай турбулентнасьці ў Расеі гэта не паменшыць, больш таго – турбулентнасьць ва ўладзе толькі пачынаецца, і мы яшчэ станем сьведкамі такіх сцэн, у параўнаньні зь якімі арышт Улюкаева – проста дзіцячае лепятаньне.

Тытанік пераможцаў ідзе на дно.

Віталь Портнікаў
Пераклад з расейскай.
Крыніца: http://www.liga.net/opinion/305152_titanik-pobediteley-gotov-li-putin-sdat-medvedeva-silovikam.htm

25/11/2016 › Навіны


Навіны
Аналітыка
Актуаліі
Курапаты
Фотаархіў
Беларускія Ведамасьці
Змаганьне за Беларусь
Старонкі гісторыі
Цікавая літаратура

Пошук:




Каляндар:

Лістапад 2016
П А С Ч П С Н
« Кас   Сьн »
 123456
78910111213
14151617181920
21222324252627
282930  

Ідзі і глядзі:

НАРОДНАЯ ПРАГРАМА «ВОЛЬНАЯ БЕЛАРУСЬ»

С. Навумчык. «Сем гадоў Адраджэньня, альбо фрагмэнты найноўшай беларускай гісторыі (1988-1995)»

З. Пазьняк. «Прамаскоўскі рэжым»

Зянон. Паэма «Вялікае Княства»

З. Пазьняк. «Развагі пра беларускія справы»

Курапаты  — беларуская сьвятыня

Збор фактаў расейскага тэрору супраць беларусаў

З. Пазьняк. «Беларуска-расейская вайна»

«Новае Стагоддзе» (PDF)

«Гутаркі з Антонам Шукелойцем» (PDF)

Парсіваль

RSS


Беларуская Салідарнасьць:

ПЛЯТФОРМА НАРОДНАГА ЯДНАНЬНЯ.

1. Беларуская Салідарнасьць гэта ёсьць плятформа Беларускага Адраджэньня, форма ідэйнай лучнасьці паміж беларусамі і пазыцыя змаганьня з акупацыйным антыбеларускім рэжымам. Яе дэклярацыя салідарнасьці простая і надзейная, па прынцыпу Каліноўскага:
— Каго любіш?
— Люблю Беларусь.
— Дык узаемна.

2. Зьместам беларускага яднаньня ёсьць Беларуская нацыянальная дзяржава. Сымвалам Беларускай дзяржавы ёсьць нацыянальны Бел-Чырвона-Белы Сьцяг і гэрб Пагоня.

3. Беларуская Салідарнасьць стаіць за праўду Беларускага Адраджэньня, якое кажа: «Не правы чалавека — галоўнае для беларусаў, а незалежнасьць і свабода, бо не бывае „правоў чалавека“ пад акупацыяй». Трэба змагацца за свабоду і вызваленьне Беларусі, а не прасіць «правоў» у рэжыма і акупантаў. Акупанты правоў не даюць. Яны пакідаюць нам «права» быць рабочым матэрыялам дзеля іхных імпэрскіх інтарэсаў.

4. Беларуская Салідарнасьць сцьвярджае і абараняе дэмакратычныя каштоўнасьці народнага агульнанацыянальнага кшталту, якія мусяць шанаваць і бараніць усе беларусы перад небясьпекай агрэсіўнай пагрозы з Расеі і перад палітыкай антынацыянальнага рэжыму Лукашэнкі на Беларусі.

5. Беларуская Салідарнасьць мацуе грунт, кірунак дзеяньняў і ідэі беларускага змаганьня ў абарону беларускай незалежнасьці, мовы, культуры, беларускай нацыянальнай уласнасьці, маёмасьці і беларускай дзяржаўнай сістэмы дэмакратычнага існаваньня нацыі.

6. Усіх беларусаў як нацыю злучае і яднае беларуская мова, беларуская гісторыя, беларуская зямля, беларуская культура, беларуская дзяржава і ўся беларуская супольнасьць людзей — Беларускі Народ.

7. Усе беларусы, незалежна ад сьветапогляду і палітычных кірункаў, яднаюцца дзеля абароны беларускіх каштоўнасьцяў, беларускіх сымвалаў і беларускіх нацыянальных інтарэсаў.

8. Формы дзейнасьці Беларускай Салідарнасьці могуць быць рознымі, але заўсёды павінна ўлічвацца антыбеларуская палітыка прамаскоўскага рэжыму на Беларусі і пагроза нашаму нацыянальнаму, культурнаму і дзяржаўнаму існаваньню. Таму ва ўсіх справах — Беларусь перад усім. Трэба шанаваць усё беларускае. Шанаваць беларускую дзяржаўнасьць. Шанаваць беларускую мову і беларускі народ. Шанаваць беларускую зямлю і беларускую культуру. Шанаваць здабытак народнай працы. Беларус беларуса мусіць бараніць перад небясьпекай. Беларус беларусу мусіць дапамагаць. Беларус беларуса павінен падтрымліваць паўсюдна на Беларусі і ва ўсім сьвеце.


Сябры й партнэры:

Кансэрватыўна-Хрысьціянская Партыя - БНФ


Беларуская Салідарнасьць // 2000—2024