Агляд замежнага друку

(12.09. – 15.09.2014)

Куды там кітайцам!

12 верасьня 2014 г. польская газэта “Gazeta Wyborcza” напісала пра вынікі сацыялагічнага апытаньня ў Кітаі і Японіі. 54% кітайцаў баяцца вайны зь Японіяй, а 29% японцаў баяцца вайны з Кітаем.

Наш камэнтар: У азіяцкіх народаў вялікая частка грамадзтва баіцца, а значыць ня хоча, жадае пазьбегнуць вайны. А яшчэ кажуць пра азіяцкую абыякавасьць да чалавечага жыцьця. Вунь у Расеі бальшыня папуляцыі гукае: “Путин, родной, души хохлов! Всё у тебя получится!” Вось дзе сапраўдная азіяцка-таталітарная мэнтальнасьць. Куды там кітайцам!

Юрка Марозаў

***

Гіркін узьнік у Маскве

13 верасьня 2014 г. славацкая газэта “Pravda” паведаміла, што “Рэмба Данбаса” Стралкоў (у сапраўднасьці палкоўнік расейскай ваеннай выведкі Гіркін) узьнік у Маскве. Ён заявіў, што цяпер будзе “абараняць Пуціна ў Маскве”.

Наш камэнтар: Ведаючы, як Гіркін “наабараняў” ва Украіне, мы віншуем “дорогіх россіян” са зьяўленьнем такога “абаронцы”.

Алесь Хадасевіч

***

Нам бы іхныя праблемы

15 верасьня 2014 г. румынская газэта “Evenimentul Zilei” напісала: “Беспрэцэдэнтная сытуацыя. Вучні ня маюць падручнікаў у першы дзень навучаньня. Упершыню пасьля рэвалюцыі малыя ня маюць на партах нават буквара. Трэба паслаць у адстаўку міністра адукацыі?” На фота ў газэце – сымпатычныя першакласнікі ў румынскай школе.

Наш камэнтар: У беларускія класы прышлі такія ж сымпатычныя першакласнікі. Ім своечасова паклалі на парты падручнікі. Румынам такое ня сьнілася з часоў даўняга турэцкага іга. Усе падручнікі для беларускіх дзяцей – акупанцкія, маскальскія, на чужой мове. У першы ж дзень ім распавялі ў школе: “Дети, у нас два языка…” Але ўсе цудоўна разумеюць, што беларускай мове няма месца на ўсіх узроўнях адукацыі ў нашай акупаванай краіне. Прывіваць любоў да роднай мовы, вучыць на ёй дзяцей сем’і могуць толькі самастойна, дома, пасьля заняткаў у акупанцкай махіне русіфікацыі. Так будзе да вызваленьня Беларусі ад акупанцкага рэжыму. Румыны ня ведаюць пра такія праблемы.

Алесь Хадасевіч

***

Масква пагражае атамнай зброяй

15 верасьня 2014 г. чэшская газэта “Ceske Noviny” напісала з Украіны. Міністар абароны Валеры Гелэтэй заявіў, што Расея пагражае Украіне тактычнай ядзернай зброяй. У сувязі з гэтым Кіеў разглядае магчымасьць распрацоўкі ўласнай ядзернай зброі.

Наш камэнтар: Перадача маскоўскай імпэрыі (учорашняму акупанту) ядзернай зброі пад гарантыі Захаду было вялікай памылкай Украіны і Беларусі. Цяпер акупант пагражае гэтымі ракетамі. Трэба ўзбройваць народ і адбіваць атакі агрэсара. Гэтая вайна можа скончыцца толькі разбурэньнем Карфагена.

Юрка Марозаў

***

Нават расейцы зразумелі

15 верасьня 2014 г. аўстрыйская газэта “Der Standard” паведаміла, што ў Расеі адбыліся мясцовыя выбары, паўсюль перамагла пуцінская “Едіная Россія”. Апазыцыйныя групоўкі, накшталт “Яблыка”, пацярпелі паразу і паведамляюць пра шматлікія парушэньні.

Наш камэнтар: Людзі паведамляюць з Расеі, што там адбыўся, фактычна, байкот выбараў. Расейцы на выбары масава не пайшлі, бо зразумелі, што гэта ня выбары.

Алесь Хадасевіч

***

Правы фашысцкай агентуры

15 верасьня 2014 г. летувіская газэта “Lietuvos Rytas” паведаміла пра заявы з Масквы. МЗС Расеі зьвярнуўся да міжнароднай супольнасьці з заклікам забясьпечыць правы расейскамоўных у Латвіі і Эстоніі. Сярод іншага супрацоўнік МЗС К. Далгоў заявіў: “Больш за 50% людзей у большых гарадах Латвіі – расейскага паходжаньня. Вось у сэрцы Эўропы парушаюцца правы чалавека”.

Наш камэнтар: І так будзе бясконца, да самага канчатковага развалу маскоўскай імпэрыі. А казалі разумныя людзі ў балтыйскіх грамадзтвах у 1991 годзе казалі, што трэба выдаляць у Расею ўсіх тых, хто сваімі дзеяньнямі засьведчыў свае акупанцкія функцыі ў балтыйскіх рэспубліках, хто адкрыта ненавідзеў мову, культуру і сам мясцовы народ. Іх не паслухалі, спаслаліся на “правы чалавека”. Бальшыня іх засталася са сваёй нянавісьцю і агентурнымі функцыямі. У выніку ніяк не разблытацца з гэтымі шпіёнскімі “правамі”.

Юрка Марозаў

21/9/2014 › Навіны