Фальш на розныя лады

Подзьвіг фронтаўца Сяргея Каваленкі выклікаў энтузіязм і салідарную падтрымку патрыётаў па ўсёй Беларусі. Зразумела, што гэта напалохала антыбеларускі рэжым, які пачаў дзейнічаць ва ўласьцівым гэбізму стылі. 23 красавіка ў праграме “Панарама” БТ паказала фрагмэнт гэбоўскіх відэаздымкаў падзеяў на ганку віцебскага суду, дзе днямі зьбіралася судзілішча над Сяргеям Каваленкам. Патрыёт проста перад будынкам суда падняў высока і з гонарам наш сьвяты Бел-Чырвона-Белы Сьцяг, чым зьбянтэжыў прысутную паліцэйшчыну і гэбоўшчыну (якая разьлічвала, што ён прыйдзе на судзілішча з апушчанай галавой і будзе прасіць літасьці). Нягледзячы на гнюсьненькія камэнтары за кадрам відэа паўнавартасна прадэманстравала мужны ўчынак Сяргея. Але гледачы заўважылі, што ўся сцэна была паказана толькі здалёк, у агульных рысах.

Затое наступны тэлесюжэт падаваўся БТ падкрэсьлена буйным плянам. Нейкага мужчыну ў цёмным паліто зазьнялі пасярод унівэрсаму, як ён сядзіць на нейкай тумбе, глыбака апусьціўшы галаву. БТ пракамэнтавала кадры: маўляў гэта ёсьць “оппозіціонер С. Коваленко, который напілся в магазіне, вот такой оппозіціонер…” Міліцыянт загадаў “пьянаму” мужчыне падняць галаву і той падняў галаву. Ягоны твар паказалі буйным плянам, але ў нейкім ракурсе ці то 1/8 ці то 1/16. Заўважна толькі было, што валасы мужчыны памаляваны пад бландына. Нос і адна скула – вось і ўвесь “партрэт нецьвярозага апазыцыянэра”. У наяўнасьці груба зьлепленая фальшыўка з “двайніком”, якога адкапалі ў гэбоўскім загашніку. Калі б Сяргея сапраўды злавілі ў пэўных абставінах, то здымалі б у поўны рост і ў фас-профіль. Ды так, каб кожны мог дваццаць разоў пераканацца: вось гэта ён – Сяргей Каваленка. Атрымалася, што БТ запрапанавала тэлегледачам параўнаць безаблічную фігуру з апушчанай галавой з фігурай С. Каваленкі, зазьнятай з вельмі далёкай пазыцыі на ганку суда. Але кантора правалілася са сваёй подлай правакацыяй. Верыць гэтай форме фальшу нармальныя людзі ня будуць.
У цэлым сюжэты на тэму “хуліганства оппозіціонера” былі ўстаўлены пасярод агульнага тэлешэрагу пра “оппозіцію”. Перад тэмай паказалі аднаго вядомага камсамольскага паэта зь ягонымі русскоязычнымі паштовачкамі “Говори правду!”, а пасьля тэмы паказвалі Пашу Севярынца з некалькімі дзесяткамі статыстаў пад сінімі сьцягамі Эўразьвязу. І ўсё пад камэнтары пра “продажность оппозіціі, которая жівёт на деньгі грантодателей”. Маўляў, Сяргей Каваленка такі ж, як і гэтая публіка. Прыёмчык вядомы, даўні. Менавіта дзеля такіх прыёмчыкаў і існуе ў якасьці антуражу прамаскоўская псэўдаапазыцыя, якая ёсьць арганічнай часткай рэжыму.

Раней і на Радыё Свабода засьвяцілася некалькі такіх “оппозіціонеров”. Вядомы Фінькевіч прыязджаў у Віцебск (дзе Сяргей Каваленка ўздымаў наш нацыянальны сьвяты Сьцяг). Фінькевіч і ягоныя таварышы “у знак салідарнасьці” ўзьнялі былі ў Віцебску свае апэльсінавага колеру сьцягі. А нядаўна фотатэка Радыё Свабода паказала здымак яшчэ аднаго “оппозіціонера”, які назваўся кандыдатам ад “Партыі БНФ” і завабліваў віцеблянаў на мясцовыя “выбары” дыктатуры сваім выбарчым плакацікам. На плакаціку (з надпісамі на акупанцкай расейскай мове) быў здымак гарадзкой яліны, над якой С. Каваленка ўзьняў Бел-Чырвона-Белы Сьцяг. Трэба патлумачыць, што йдзецца пра кандыдата-дзеячыка з псэўда-БНФ начале з “чалавекам у галіфэ” Янукевічам. Мэтай згаданых дзеячыкаў такая ж як мэта рэжыму – дэскрыдытацыя Сяргея Каваленкі і ягонага мужнага ўчынку і ў той жа час подленькая спроба “прыляпіцца” да ягонага подзьвігу.

Адным словам, фальшывыя ўчынкі фальшывых асобаў. Фальш на розныя лады. Але беларусы разьбяруцца, адрозьняць сапраўдны гераізм ад канторскай стылізацыі.

Янка Базыль

24/4/2010 › Навіны