Ці трэба беларусам падтрымліваць “Европейский марш” у тупік?

На працягу некалькіх месяцаў гэтак званая “аб’яднаная апазыцыя” начале з камуністам С. Калякіным вядзе падрыхтоўку “Европейского марша” ў Менску. “Марш” прызначаны на 14 кастрычніка сёлета і мае адбыцца па пратаптаным маршруце псэўдаапазыцыі: ад Акадэміі Навук да пл. Бангалор (хоць напачатку заяўлена, што пойдуць да новага будынка Нацыянальнай бібліятэкі).
Як гэта часта бывала раней, арганізатары прызначылі свой “марш” за два тыдні да важнай беларускай даты: гэтым разам Дня Памяці продкаў Дзяды, які беларусы ў Менску традыцыйна адзначаюць мэмарыяльнымі мерапрыемствамі на прыканцы кастрычніка – народным крыжовым шэсьцем у Курапаты. Планіроўшчыкі паказнога “эўрапейскага маршу” зацікаўленыя, каб зьбіць энэргію народнага выступу, разьвеяць яе на пустым і бессэнсоўным маршы па вуліцах сталіцы. Ужо самы парамэтры і зьмест псэўдаапазыцыйнага мерапрыемства (шуканьне паразуменьня з антыбеларускімі уладамі) сьведчаць пра падступныя і няшчырыя намеры арганізатараў.

Апошні “марш”, які называўся “за свабоду”, быў праведзены псэўдаапазыцыяй у 2001 годзе. Як вядома, “марш” выклікаў расчараваньне людзей, якіх павадзілі пад канвоем міліцыі і потым кінулі пад рэпрэсіі рэжыму. Чаму арганізатары аднаўляюць гэтую правакацыйную форму мерапрыемства? Справа ў тым, што за шэсьць гадоў з тае пары вырасла і пасталела новае пакаленьне беларускай моладзі. Маладыя не прымаюць антыбеларускі рэжым, ягоную нуду і дурасьць, бачаць эканамічны правал і паліцэйшчыну. Моладзь хоча пратэставаць і ўключацца ў змаганьне. Менавіта гэтых хлопцаў і дзяўчат псэўдаапазыцыянэры заклікаюць маршыраваць “по-европейскі” на мясцовы Бангалор. Спэцслужбы атрымаюць цудоўную магчымасьць высьветліць асобы сапраўдных маладых патрыётаў і будуць імкнуцца здушыць пратэстны патэнцыял.
Гэта праўда, што ў змаганьні трэба рызыкаваць. Але ў імя чаго? Псэўдаапазыцыя пасылае моладзь на марш не пад сьвятым нацыянальным Бел-Чырвона-Белым Сьцягам, а пад блакітнымі чужымі небеларускімі сьцягамі. Кіраўнікам псэўдаапазыцыі важна засьведчыць перад заходнімі грантадаўцамі сваю “адданасьць сумесным ідэалам” з Брусэлем і атрымаць за гэта чарговыя гранты ў свае сямейныя бюджэты. Карупцыянэры ад гранта будуць выкарыстоўваць ахвярнасьць і мужнасьць маладых для падтрыманьня свайго камфорту. Гэта ж так! Усе пра іхнюю карумпаванасьць ужо ведаюць.

“Маршы” — безвыніковая форма палітычнага дзеяньня. Неразумна маршыраваць у тупік і бяссэнсава падстаўляцца пад удар дыктатуры пад камандай карупцыянэраў. “Марш” рыхтуецца адыёзнымі асобамі, якія ўжо прадэманстравалі свае абыякавыя адносіны да лёсу Бацькаўшчыны: А. Лебедько, В. Вячорка, А. Мілінкевіч і інш. Нельга ўжо давяраць гэтым імітатарам палітычнага змаганьня. Яны правалілі ўсё, што можна было праваліць. Гэтая псэўдаапазыцыя зьяўляецца неад’емнай часткай антыбеларускага рэжыму. Успомніце, як згаданыя асобы неаднаразова езьдзілі ў Маскву і прапанавалі там “наладзіць інтэграцыю Беларусі і Расеі лепш за Лукашэнку”. Гэтым разам яны зьбіраюцца запрасіць на “марш” сваіх хаўрусьнікаў-дэмакратаў з Масквы, якія будуць зноў казаць пра “вечную дружбу нашых народаў”. Але сэнс гэтых ваяжоў не ў “дружбе”, гэта ёсьць прыклады здрады беларускім інтарэсам.

Дык колькі ж можна давяраць правакатарам і папам-гапонам! І ці варта далучацца да іхняга пустога і шкоднага “маршу”?

Беларусам лепш не “маршыраваць” за падстаўной прамаскоўскай “апазыцыяй”, а гуртаваць свае сілы і абараняць свой народ, сваю нацыю, зямлю, маёмасьць, родную мову, беларускую культуру, беларускія школы. Стварайце групы падтрымкі Беларускай Салідарнасьці – шырокага грамадзкага рушэньня ў абарону незалежнасьці і свабоды нашай Бацькаўшчыны!

Ці не пара нам, усім беларусам, пачаць па сапраўднаму ратаваць Беларусь ад нацыянальнага вынішчэньня, бараніць кожнае беларускае слова, кожнага беларуса, кожную вуліцу, кожны дом, кожную пядзю нашай зямлі, ці не пара пачаць змагацца так, як некалі, калі звалілі КПСС і здабылі незалежнасьць?!
Калі пара – то з Богам наперад і пераможам!

Беларускі Народны Фронт “Адраджэньне”
і Кансэрватыўна-Хрысьціянская Партыія — БНФ

27/9/2007 › Навіны